।। सार्थ श्री सकलसंतगाथा ।।

तळवे तळहात टेंकित | डाव्या गुडघ्यानें रांगत |

रंगणी रंगनाथ | तो म्या देखिला सये ||१||

गवळण जसवंती पैं सांगे | आलें या कृष्णाचेनि मागे |

येणें येणें वो श्रीरंगें | नवनीत माझें भक्षिलें ||धृ||

एक्याहातीं लोण्याचा कवळू | मुख माखिलें आळूमाळू |

चुंबन घेता येतो परिमळू | नवनीताचा गे सये ||३||

येणें माझें कवाड उघडिलें | येणें शिंकें हो तोडिलें |

दह्यादुधातें भक्षिलें | उलंडिलें ताकातें ||४||

ऐसें जरी मी जाणतें | यमुना पाणिया नच जातें |

धरुनी खांबासी बांधितें | शिक्षा लावितें गोविंदा ||५||

ऐसा पुराणप्रसिद्ध चोर | केशव नाम्याचा दातार |

पंढरपुरी उभा विटेवर | भक्त पुंडलिकासाठी ||६||

talave talhaat talahat tekit davya gudaghyane rangat rangani ranganath to mya dekhila saye