।। सार्थ श्री सकलसंतगाथा ।।

गोकुळीं लाघव दावितो चक्रपाणि | भोवत्या वेष्टित बैसल्या अवघ्या गौळणी |

मध्ये सुकुमार सांवळा शारंगपाणि | चिमणा पीतांबर पिवळा |

गळा वैजयंती माळा | घवघवीत घनसांवळा | पाहे नंदराणी ||१||

नाच रे तू कृष्णा मज पाहुं दे नयनी ||धृ||

नाचतो सांवळा सुंदर निमासुर वदन | वाळें घोळ घागरीयांचा झणत्कार पूर्ण |

आकर्ण नयन सुहास्य वदन पाहुनी भुले मदन | हातीच्या मुद्रिका झळकती |

क्षुद्र किंकिणी सुस्वर गाती | वाकी नुपुरें ढाळ देती | पाहती गौळणी ||२||

सप्तही पाताळे नाचती हरीचिया छंदे | आकाश धरणी स्वर्गी देव नाचती आनंदें |

गण गंधर्व देव सर्व अक्षर हरीपदें | वैकुंठ कैलास नाचती |

चंद्र सूर्य रसनायक दीप्ती | ऋषीमंडळ धाक तोडिती | अद्भुत हरीकरणी ||३||

नाचातीं हरिपदें चतुर्दश लोकपाळ | शेष वासुकी नाचती सर्वही फणीपाळ |

परिवारेसी नाचती पृथ्वीचे भूपाळ | मेरू पर्वत भोगी नायक |

वनस्पती नाचती कौतुक | वेदशास्त्र पुराण पावक | नाचत शूळपाणि ||४||

नाचती गोपाळ गोपिका सुंदर मंदिरें | उखळे जाती मुसळे पाळीं आणि देव्हारे |

धातुमूर्ति नांचुं लागल्या एकसरें | गौळणी अवघ्या विस्मित |

देहभाव हरपला समस्त | यशोदेसी प्रेम लोटत | धरिला धांवूनी ||५||

शिणलासी नाचतां आतां पुरें करीं हरी | विश्वरूप पाहतां गोपी विस्मित अंतरी |

यशोदेने कृष्ण घेतला कडियेवरी | एका जनार्दनीं भक्तीभाव | 

अनन्य भक्ता दावी लाघव | निज भक्तांचे काज सर्व | करितां शीण न मानीं ||६||

gokuli laghav davito chakrapani